ЭЛ БААТЫРЛАРЫ ЭСКЕРИЛИП, ЭЛДИК РЕВОЛЮЦИЯГА БАА БЕРИЛДИ.

Бүгүн, 7-апрелде Нарын шаарындагы «Тянь-Шань» паркында  Апрель Элдик революциясынын күнүнɵ арналган эскерүү митинги ɵткɵрүлүп, элдин эркиндиги, мамлекеттин келечеги үчүн шейит болгон кыргыз уулдары эскерилип, Апрель Элдик революциясына коомчулук тарабынан дагы бир ирет баа берилди.

Бул күнү таӊ эрте эл уулдарынын эстелиги алдына шаар  тургундары чогулуп, муӊдуу күүнүн коштоосунда эстеликке гүлчамбарлар коюлду.

Апрель окуясында курман болгон теӊир тоолук 36 баатырдын сүрɵттɵрү мектеп окуучулары тарабынан сыймыктануу менен кɵтɵрүлүп турду.

Эскерүү митингин ачкан Нарын шаарынын мэри Эмилбек Алымкулов: «Апрель революциясы-ɵлкɵдɵ башкы күч Эл экендигин, кыргыз элинин канында акыйкаттык, калыстык, эркиндик үчүн ажалдан кайра тартпай турган баатырдык мүнɵз бар экендигин далилдеген окуя катары тарыхта жазылып калды. Шейит кеткен кыргыз уулдарынын чечкиндүү кадамы менен чыныгы демократияга, ɵлкɵбүздүн жаркын келечегине жол ачылып, мамлекетибиздин бүтүндүгү, эгемендиги сакталды»,-деп белгиледи.

Ошондой эле Элдик революциянын алгачкы кадамдары Теӊир Тоо жергебизден башталганын, алдыбызда Элдик революциянын башкы максаты болгон адилеттүү башкарууну, ɵнүккɵн ɵлкɵнү куруу, биримдик, ынтымак менен шаарыбыздын, ɵлкɵбүздүн ɵнүгүүсүнɵ салым кошуу милдеттери турганын, уюткулуу кыргыз эли турганда баатыр уулдардын жаркын элеси түбɵлүккɵ жашап, алардын эрдиги муундан муунга үлгү болоорун билдирип,  жакындарына кайрат айтты.

Мындан кийин эскерүү мүнɵтү жарыяланып, баатырларга багышталып куран окулду.

Эскерүү митингине катышкан Кыргыз Республикасынын Ѳкмɵтүнүн Нарын облусундагы ыйгарым укуктуу ɵкүлү Аманбай Кайыпов ɵз сɵзүндɵ Апрель Элдик революциясына тарыхый баа берүү менен ошол кандуу окуяда Теӊир Тоо жергесинен эле 25 баатыр курман болгонун, алардын ысымдары тарыхта алтын тамгалар менен жазылып, жүрɵгүбүздɵ түбɵлүккɵ сакталышы керектигин айтты.

Иш чарада Нарын шаардык Кеӊешинин тɵрагасы Ж. Ботоканов, Нарын райондук мамлекеттик администрациясынын башчысы С. Черикбаев, «Мекен шейиттери» коомдук уюмунун мүчɵсү Ш. Актанова, Апрель Элдик революциясынын катышуучусу Э. Асаналиев жана башкалар Элдик революциянын келип чыгышы, анын курмандыктары, натыйжасы, келечектеги максаттар туурасында билдирип, баатырларды эскеришти.

IMG_8878_result IMG_8881_result IMG_8883_result IMG_8888_result IMG_8890_result IMG_8895_result IMG_8900_result IMG_8901_result IMG_8902_result IMG_8905_result IMG_8910_result IMG_8911_result IMG_8912_result IMG_8917_result IMG_8918_result IMG_8919_result IMG_8922_result IMG_8924_result

 

 

FacebookTwitterVKOdnoklassnikiWhatsAppДостор менен бөлүшүү

Добавить комментарий